రేషన్ కార్డు దారులకు బిగ్ రిలీఫ్..!

రేషన్ కార్డు దారులకు బిగ్ రిలీఫ్..!
– ఇంటి నుంచే ఈకేవైసి చేసుకునే చాన్స్
– మొబైల్ లోనే ఎలా చేసుకోవాలో తెలుసుకోండి
దర్శిని డెస్క్: ఇప్పటివరకు రేషన్ కార్డు e-KYC కోసం మీసేవ కేంద్రాలు, రేషన్ దుకాణాల వద్దకు వెళ్లాల్సి వచ్చేది. అయితే అందుబాటులో ఉన్న మొబైల్ ఆధారిత విధానం ద్వారా లబ్ధిదారులు తమ ఇంటి నుంచే e-KYC ప్రక్రియను పూర్తి చేసుకునే అవకాశం ఉంది.

ఇతర ప్రాంతాల్లో నివసిస్తున్న వారు, ఉద్యోగం లేదా వ్యాపార పనులతో బయటకు వెళ్లలేని వారు కూడా ఈ విధానాన్ని ఉపయోగించుకోవచ్చు.

రెండు యాప్స్‌ ఉంటే చాలు
మొబైల్‌లో e-KYC పూర్తి చేసేందుకు Mera eKYC, AadhaarFaceRD యాప్స్‌ అవసరం. వీటిని ఇన్‌స్టాల్ చేసిన అనంతరం అవసరమైన అనుమతులు ఇచ్చి ప్రక్రియను ప్రారంభించాలి.

e-KYC ఎలా చేయాలి?
యాప్స్‌ ఇన్‌స్టాల్ చేయాలి
ముందుగా మొబైల్‌లో Mera eKYC, AadhaarFaceRD యాప్స్‌ను ఇన్‌స్టాల్ చేసుకోవాలి. Mera eKYC యాప్‌ను ఓపెన్ చేసి కెమెరా, లొకేషన్ పర్మిషన్లను Allow చేయాలి.

రాష్ట్రాలను ఎంచుకోవాలి
యాప్‌లో Residing Stateలో ప్రస్తుతం నివసిస్తున్న రాష్ట్రాన్ని, Home Stateలో రేషన్ కార్డు ఉన్న సొంత రాష్ట్రాన్ని ఎంపిక చేసి Proceed చేయాలి.

ఆధార్‌తో వెరిఫికేషన్
12 అంకెల ఆధార్ నంబర్‌ను నమోదు చేసి Generate OTPపై క్లిక్ చేయాలి. ఆధార్‌కు అనుసంధానమైన మొబైల్ నంబర్‌కు వచ్చిన OTPతో పాటు స్క్రీన్‌పై కనిపించే Captchaను నమోదు చేసి Submit చేయాలి.

లబ్ధిదారుల వివరాలు పరిశీలించాలి
వెరిఫికేషన్ పూర్తయిన తర్వాత రేషన్ కార్డుకు సంబంధించిన లబ్ధిదారుల వివరాలు స్క్రీన్‌పై కనిపిస్తాయి. పేరు తదితర వివరాలను పరిశీలించిన అనంతరం Face eKYC ఆప్షన్‌ను ఎంచుకోవాలి. అనంతరం Declarationను అంగీకరించి ACCEPTపై క్లిక్ చేయాలి.

ముఖ గుర్తింపు పూర్తి చేయాలి
కెమెరా అనుమతి కోరితే Allow చేయాలి. స్క్రీన్‌పై కనిపించే వృత్తంలో ముఖాన్ని సరిగ్గా ఉంచాలి. సూచనల ప్రకారం కళ్లను కొన్ని సార్లు రెప్పవేయడంతో Face Verification పూర్తవుతుంది.

e-KYC పూర్తయినట్లు నిర్ధారణ
ముఖ గుర్తింపు విజయవంతంగా పూర్తయిన తర్వాత “eKYC Status: Success” అనే సందేశం కనిపిస్తుంది. దీంతో e-KYC ప్రక్రియ పూర్తయినట్లు తెలుస్తుంది.

జాగ్రత్తలు తప్పనిసరి
e-KYC చేసేటప్పుడు ఆధార్ నంబర్, OTP వంటి వ్యక్తిగత వివరాలను ఇతరులతో పంచుకోకూడదు. యాప్స్‌ను అధికారిక యాప్ స్టోర్ నుంచే డౌన్‌లోడ్ చేసుకోవడం మంచిది. అలాగే ప్రక్రియలో సమస్యలు ఎదురైతే సంబంధిత అధికారిక రేషన్/పౌరసరఫరాల సేవా కేంద్రాన్ని సంప్రదించాలి.

మొత్తానికి.. రేషన్ కార్డు e-KYC కోసం బయటకు వెళ్లాల్సిన అవసరాన్ని తగ్గిస్తూ మొబైల్ ద్వారానే ప్రక్రియ పూర్తి చేసుకునే అవకాశం లబ్ధిదారులకు సౌకర్యంగా మారనుంది.

పోట్లీ మహారాజ్ దేవస్థానం చైర్మన్‌గా.. సుదర్శన్‌గౌడ్‌..?