ఆస్ట్రేలియా మార్కెట్‌లోకి తాండూరు కందులు..!
– తొలిసారి ఎగుమతికి గ్రీన్ సిగ్నల్‌
– అపెడా సహకారంతో 2.5 మెట్రిక్‌ టన్నుల ఎగుమతి
– ఈ ఘనతకు కారణం ఇదే..
తాండూరు, దర్శిని ప్రతినిధి: తాండూరు కందులు అంతర్జాతీయ మార్కెట్‌లోకి అడుగుపెడుతున్నాయి. జీఐ గుర్తింపు పొందిన ఈ ప్రత్యేక కందులు తొలిసారిగా ఆస్ట్రేలియాకు ఎగుమతి అవుతున్నాయి.
అపెడా సహకారంతో 2.5 మెట్రిక్‌ టన్నుల కందుల సరుకును బుధవారం హైదరాబాద్ నుంచి ఎగుమతికి ప్రారంభించారు. తాండూరు ప్రాంత వ్యవసాయ ఉత్పత్తికి అంతర్జాతీయ గుర్తింపు తీసుకురావడంలో ఇది కీలక ముందడుగుగా నిలిచింది.
హైదరాబాద్‌కు చెందిన దుర్గా ఎక్స్‌పోర్ట్స్‌ అండ్‌ ఇంపోర్ట్స్‌ సంస్థ ‘అమ్మాస్‌’ బ్రాండ్‌ పేరుతో ఈ కందులను ఎగుమతి చేస్తోంది. సముద్ర మార్గంలో ఆస్ట్రేలియాకు చేరనున్న సరుకును అక్కడి భారతమ్మ పీటీవై లిమిటెడ్‌ సంస్థ దిగుమతి చేసుకోనుంది.
రాష్ట్ర వ్యవసాయ శాఖ ప్రభుత్వ కార్యదర్శి సురేంద్ర మోహన్‌, అపెడా అసిస్టెంట్‌ జనరల్‌ మేనేజర్‌ ఆర్‌.పి. నాయుడు వర్చువల్‌గా ఎగుమతిని ప్రారంభించారు. ఇతర అధికారులు, ఎగుమతిదారుల ప్రతినిధులు పాల్గొన్నారు.
జీఐ గుర్తింపుతో ప్రత్యేక ఖ్యాతి
తాండూరు, బషీరాబాద్‌, పెద్దేముల్‌, యాలాల మండలాల్లోని వర్షాధార భూముల్లో తాండూరు కందులను ప్రధానంగా సాగు చేస్తారు. ఈ ప్రాంతంలోని నల్లరేగడి నేలలు, ప్రత్యేక భౌగోళిక పరిస్థితులు కందులకు ప్రత్యేక లక్షణాలను అందిస్తున్నాయి. వీటిలో 22 నుంచి 24 శాతం వరకు మాంసకృత్తులు ఉంటాయని అందించిన వివరాలు పేర్కొంటున్నాయి. రుచి, వంటకు అనుకూలత, నిల్వ ఉండే గుణం వీటి ప్రత్యేకత.
రైతులకు కొత్త అవకాశాలపై ఆశలు
జీఐ గుర్తింపు పొందిన వ్యవసాయ ఉత్పత్తులను అంతర్జాతీయ మార్కెట్లలో ప్రోత్సహించేందుకు అపెడా కృషి చేస్తోంది. తాండూరు కందుల తొలి ఆస్ట్రేలియా ఎగుమతితో మరిన్ని విదేశీ మార్కెట్లను అన్వేషించే అవకాశం ఏర్పడింది. భవిష్యత్తులో డిమాండ్‌ పెరిగితే ఈ ప్రాంత రైతులు, ఉత్పత్తిదారులు, ఎగుమతిదారులకు కొత్త అవకాశాలు లభించే వీలుంది. తాండూరు వ్యవసాయ ఉత్పత్తికి ప్రపంచస్థాయి గుర్తింపు దిశగా ఈ ఎగుమతి ప్రాధాన్యం సంతరించుకుంది.
