మజ్జిగలో ఆరోగ్య మంత్రం..!

మజ్జిగలో ఆరోగ్య మంత్రం..!
– ఖాళీ కడుపుతో తాగితే అద్భుత ప్రయోజనాలు
– వేసవిలో గ్యాస్‌ సమస్యలు దూరం
దర్శిని డెస్క్ : వేసవి కాలం రాకముందే ఎండలు మండిపోతున్నాయి. వేసవి వేడి నుండి ఉపశమనం పొందడానికి ప్రజలు ఐస్ క్రీం, శీతల పానీయాలు తీసుకుంటారు. కానీ, కొన్ని శారీరక రుగ్మతలతో బాధపడేవారు వీటికి దూరంగా ఉండటం మంచిది. అయితే ఎండలకు మజ్జిగ సేవించడం వల్ల అద్భుత ప్రయోజనాలను పొందవచ్చని ఆరోగ్య నిపుణులు చెబుతున్నారు. మండే వేడి నుంచి తప్పించుకోవడానికి ప్రజలు వివిధ రకాల శీతల పానీయాల వైపు మొగ్గు చూపుతున్నారు. కానీ, వాటన్నింటిలో మజ్జిగ అత్యంత ప్రయోజనకరమైనది. మజ్జిగ తాగడం వల్ల శరీరం చల్లబడుతుంది. ఇది కడుపు ఆరోగ్యానికి కూడా చాలా మంచిది. రోజు ఉదయం ఖాళీ కడుపుతో మజ్జిగ తాగితే బోలెడు ఆరోగ్య ప్రయోజనాలు ఉన్నాయని నిపుణులు చెబుతున్నారు. అవెంటో ఇప్పుడు తెలుసుకుందాం..

మజ్జిగలో పోషకాలు పుష్కలంగా ఉంటాయి, మజ్జిగ తాగడం వల్ల ఎముకలు బలపడతాయి. ఇందులో కాల్షియం, విటమిన్ బి12, జింక్, రిబోఫ్లేవిన్, ప్రోటీన్లు పుష్కలంగా ఉన్నాయి. ఆయుర్వేదం ప్రకారం, మజ్జిగను పగటిపూట ఎల్లప్పుడూ తీసుకోవాలి. దీనితో పాటు కడుపు సంబంధిత వ్యాధులు ఉన్నవారు కూడా దీనిని తీసుకోవచ్చు. ఉదయం ఖాళీ కడుపుతో మజ్జిగ తాగడం వల్ల రోజంతా ఉత్సాహంగా ఉండవచ్చు. మజ్జిగ తాగడం వల్ల శరీరంలో నీటి కొరత కూడా తొలగిపోతుంది. కడుపు సమస్యలు ఉన్నవారు అల్పాహారంగా మజ్జిగ తాగవచ్చు. ఉదయం ఖాళీ కడుపుతో మజ్జిగ తాగడం వల్ల మలబద్ధకం, అజీర్ణం, గ్యాస్ వంటి కడుపు సమస్యలు తొలగిపోతాయి.

మజ్జిగ తాగడం వల్ల చెడు కొలెస్ట్రాల్‌ తగ్గుతుంది. అధిక దాహం తీరుతుంది. అంతేకాదు, వడ దెబ్బ తగలకుండా ఉంటుంది. జీలకర్ర, ధనియాలు, అవిసెగింజలు, సైంధవ లవణం మెత్తగా పొడి చేసుకుని మజ్జిగలో కలుపుకుని తాగితే మంచిది. ఇందులో పంచదార, ఉప్పు బదులుగా పైన చెప్పుకున్న మిశ్రమాన్ని ఒక చెంచా మోతాదులో కలిపి తాగండి, వడదెబ్బ కొట్టదు, పేగులకు బలాన్నిస్తుంది, జీర్ణకోశ వ్యాధులన్నింటికీ ఇది మేలు చేస్తుంది, వేసవిలో కలిగే జలుబుని నివారిస్తుంది.

(నోట్‌: ఇంటర్నెట్‌లో సేకరించిన సమాచారం ఆధారంగా ఈ వివరాలు మీకు అందించటం జరిగింది. కేవలం అవగాహన కోసం మాత్రమే. తదుపరి జరిగే ఎలాంటి పరిణామాలకు ‘దర్శిని న్యూస్’ బాధ్యత వహించదు.)

ఇదికూడా చదవండి…

పసిబిడ్డతో డ్యూటీ..!